Das Bündner Generalabonnement

10:15 | La purschida speziala en l'inserat da la gasetta è irresistibla. Gist la frittera che jau vuleva gia adina. Cun l'auto èn quai mo paucas minutas fin Cuira. Oz da mezdi datti pommes à la Maya!
10:43 | Tut va bain. Jau sun gia bunamain al lieu da destinaziun. Che mia chasa da parcar preferida è plaina, è bain donn, ma i dat gea alternativas.
11:07 | È quai pussaivel ch'il mez Grischun dovra oz ina nova frittera? Quai è gea il caos total qua.
11:55 | Pulit enervada chat jau la finala tuttina anc ina plazza da parcar. La frittera è ussa qua sper mai – e davant mai in stgarnuz pommes à la Ronald. Per ir a temp a chasa e far gentar n'hai displaschaivlamain betg pli bastà.

En la citad cun il BÜGA: en moda flexibla, fidada e relaxada.

En 20 minutas scuntr jau mia amia Ladina a Casti. Dapi che jau hai il favuraivel «BÜGA-Plus Familia», ans vesain nus bler pli spontanamain. E noss temas da discussiun na van mai a fin, pertge che l'auto da posta – cun WiFi gratuit – è il lieu ideal per m'infurmar davart quai che curra e passa tar nus ed ora en il mund. Instagram: check! Facebook: check! Watson News: check! Bored Panda: check! Oz en damaun hai jau fatg ina coola fotografia d'ina giaglina sin ina chaura. Quai dat in mega post en Facebook. Check! Uschia survegn il num «auto da posta» ina significaziun tut nova. Tscheccas ti?

Visitar amis cun il BÜGA: en moda flexibla, fidada e relaxada

En paucs muments arrivain nus a Segl. Party da gril tar Daniela e Sven. L'atmosfera è super – auter che l'ultima giada. Quella giada essan nus ids cun l'auto da Gian. Quai è bain stà vaira pratic. Mo tup che Gian – sco sulet – ha dastgà baiver mo Cola ed aua minerala. Insatgi auter n'ha el er betg vulì laschar manar sia nova «maschina». Cur ch'il stumi d'Andrea ha undrà, sin via a chasa, en atgna moda, il stil da guidar sportiv da Gian, n'è la finala betg mo l'atmosfera stada giu per terra. Questa giada essan nus ans decidids per il traffic public. La party po ussa cumenzar senza quitads. E finida n'è ella anc ditg betg, perquai che l'ultim bus cursescha la fin d'emna pir tard suenter mesa notg.

Ir a partys cun il BÜGA: en moda flexibla, fidada e relaxada

Bingo! Quest di cumenza gea «perfetgamain». Sco usità hai jau termins vaira stretgs – quai vul dir, jau sun puspè ina giada fitg tard. Saja sco ch'i veglia. Jau fatsch in sigl sportiv en l'auto e l'indicatur dal tanc sbrinzla, anc avant che jau hai bandunà la garascha. Tge emporti? Pauc pli tard fil jau cun in retard da mo 15 minutas en direcziun da mes termin. En tempo d'ir a pe! Per che jau perdia en l'avegnir anc pli pauc temp sin via, vegn quella numnadamain gist renovada per mai. Co pudess jau pia ma grittentar pervia da quest plazzal? Il frust tegn jau pli gugent en salv per pli tard. Curt avant la destinaziun aud jau er gia il culp da partenza. In mument: il culp da partenza? Quai è stà mes pneu davant a sanestra! Entant che jau spetg sin il servetsch da pannas, hai jau prima temp da m'infurmar davart il BÜGA. La vita è simplamain memia curta per dis uschè «perfetgs».

Pendular cun il BÜGA: en moda flexibla, fidada e relaxada

Savens vegn jau dumandada, pertge che jau n'abitia betg a Cuira, empè da pendular mintga di. Il motiv è simpel: Jau na vuless renunziar ni a mia plazza ni a mes lieu d'origin. Per fortuna poss jau nizzegiar il temp en il tren per mia lavur. La firma ma paja schizunt il pretsch supplementar per il BÜGA da la 1. classa. Uschia poss jau savens ma concentrar meglier en il tren ch'en il travasch dal biro. E sche jau n'hai ina giada nagina quaida da lavurar, ser jau simplamain il notebook. Sche jau lasch lura sgular mes patratgs tras la cuntrada che passa sperasvia, è quai in pau sco en vacanzas. En tals muments sun jau bunamain in pau scuidusa … da mamezza.

Pendular cun il BÜGA: en moda flexibla, fidada e relaxada

Mes amis pretendan che jau saja adina sut tensiun. Quai constat in pau, pertge che dapi che jau hai in velo da muntogna electric, na ma dumognan ins strusch pli giu da la sella. Durant dis sco oz pir da dretg betg. Jau di mo: Bernina – Puschlav (Alp Grüm)! Da Puntraschigna vai sur il pass dal Bernina fin giu Puschlav. 570 meters d'autezza ensi e lura 1365 engiu. Ormons da ventira, vus dastgais ussa vegnir! Avant che nus prendain la Retica a Puschlav per turnar sin il pass dal Bernina, datti natiralmain anc «pizza & gelato». Giu dal pass pudain nus filar pli tard rinforzads e recreads enavos a Puntraschigna, per lura turnar cumadaivlamain a chasa cun la viafier. Supereasy! E dapi che jau hai il BÜGA, è tut anc pli simpel: ussa dovr jau in bigliet mo pli per mes velo. Gea, qua han dus chattà in l'auter, pertge che er la viafier è adina sut tensiun.

Sport cun il BÜGA: en moda flexibla, fidada e relaxada

Tgi che ha in auto, na po savens strusch s'imaginar ch'i dat in med da viagiar pli cumadaivel. Er tar mai è quai stà ditg uschia. Ma cur che jau sun vegnì envidà ina giada ad in viadi cun il Gourmino, hai jau chattà il gust en il vair senn dal pled. Dapi lura viagesch jau tant sco pussaivel cun la viafier u cun il bus. L'ir cun auto è sa midà entaifer 30 onns d'ina passiun ad ina necessitad. Tant pli fitg giaud jau oz da pudair ma pusar enavos, leger insatge u giudair la cuntrada, sche jau sun en gir. I na sto gea betg adina esser in menu da 3 tratgas en il Gourmino. Gia in sandwich ed in café ma pon far ventiraivel, sche las muntognas grischunas passan sperasvia sco sin ina taila gronda. L'auto avain nus bain anc, pervia da la famiglia, ma en il fratemp na poss jau strusch pli m'imaginar da desister dal BÜGA.

Viagiar cun il BÜGA: en moda flexibla, fidada e relaxada

Mintgatant ma dumond jau, sche jau dovrel tals amis. Avair plaschair dal displaschair dals auters po esser bun ed endretg, ma tut ha ses cunfins. «Uschia na stos ti almain betg supportar il fracass d'allegria», m'han els gist scrit per SMS. Propi da rir! Natiralmain stun jau bler pli gugent qua en colonna e spetg da forsa anc chattar ina plazza da parcar, avant che l'event da bike da l'onn tutga tar l'istorgia. Jau sai, cur ch'igl è passà, èn ins adina pli intelligent. Ma tgi avess pensà ch'i dettia ina tala fulla. In mument, puspè in messadi: «Tes favurit è ussa ordavant. Nus al pudain gea drizzar ora ch'el duaja spetgar sin tai ;)›. Okay, jau hai chapì: La proxima giada prend er jau il traffic public …

Ir ad events cun il BÜGA: en moda flexibla, fidada e relaxada

En sasez vul BÜGA gea dir «abunament general grischun». Tant pli surprais essan nus stads d'udir ch'ins possia viagiar cun il BÜGA er en il Tessin. Quai n'avain nus betg ans laschads dir duas giadas. Oz giain nus a Bellinzona al Festival da blues e damaun pernottain nus là tar vegls amis ed ans sfunsain en l'atmosfera mediterrana. Quai era en sasez gia adina sin nossa glista da pendenzas, ma mintgatant dovri simplamain in stausch per daventar activ. En quest cas èsi senza dubi stà la super purschida dal BÜGA.

Vacanzas curtas en il Tessin cun il BÜGA: en moda flexibla, fidada e relaxada